Noyabrın 4–6-da Bakı Ekspo Mərkəzində Azərbaycanın ilk ixtisaslaşmış beynəlxalq daşınmaz əmlak və investisiya sərgisi AIREX 2026 keçirildi. Sərgi mənzil almaq istəyənləri, investorları, developerləri və sektor peşəkarlarını üç gün ərzində bir məkanda topladı.
60-dan çox şirkət, altı ölkə
AIREX 2026 “Baku Expo Management” və “PAŞA Property Management” şirkətlərinin təşkilatçılığı, “Times Consulting”in strateji tərəfdaşlığı və bir sıra dövlət qurumlarının dəstəyi ilə təşkil olundu.
Sərgidə 60-dan çox yerli və beynəlxalq şirkət iştirak etdi; Azərbaycanla yanaşı Birləşmiş Krallıq, BƏƏ, Türkiyə, Gürcüstan və Maldiv adaları da təmsil olundu. Təşkilatçılar üç gündə 20 min ziyarətçi gözləyirdi. Giriş ödənişsiz idi.
Niyə indi və niyə Bakı
Sərgi 2026-cı ilin “Şəhərsalma və Memarlıq İli” elan olunduğu dövrdə, Bakının yeni inkişaf mərhələsi və Qarabağ, Şərqi Zəngəzurda şəhər və kəndlərin yenidən qurulması fonunda keçirildi. Bu, ölkədə həyata keçirilən layihələrin ilk dəfə vahid platformada beynəlxalq auditoriyaya təqdim olunması deməkdir.
Üç günün proqramı
• 4 noyabr: rəsmi açılış, dövlət qurumlarının və aparıcı developerlərin stendləri, Qarabağın bərpası və xarici investisiya mövzuları. • 5 noyabr: üç panel müzakirəsi: brend rezidensiyalar, premium yaşayış, şəhər və məhəllələrin planlaşdırılması, yaşam keyfiyyəti. • 6 noyabr: bankların, developerlərin və texnologiya şirkətlərinin əməkdaşlığı; SABAH.hub ilə birgə PropTech startap müsabiqəsi.
Sərgidə İqtisadiyyat Nazirliyinin təşkilatçılığı ilə 5 yerli tikinti və daşınmaz əmlak şirkəti vahid stenddə təqdim olundu; Qarabağ Dirçəliş Fondu, MİDA və digər dövlət qurumları da iştirak etdi.
M² Perspective“AIREX-in fokusu yerli layihələrə və Azərbaycan bazarının özünü beynəlxalq kapitala təqdim etməsinə yönəlmişdi.”
